Текст песни
Оо күһүн ураты көстүүгүн
Олохпор дьүөрэлии көрсөбүн
Күннэтэ киэргэнэ кэхтиигин
Курустук атаара көрөбүн
Саһархай өҥүнэн дуйданан
Сиппэтэх ыралаах ыллыктар
Сырдыкка таласпыт санаалар
Сэбирдэх ардаҕар саһаллар
Үрүҥ түүн күөх солко түүллэрэ
Хараҥа киэһэнэн солбуллар
Былыттаах күһүҥҥү күннэрэ
Хараастыы санньыарын ыллатар
Олохпут тэтимэ түргэнин
Ойор күн сылааһа күндүтүн
Сыл хонук ааЬыыта өйдүүгүн
Сиппэтэх кэрэни саныыгын
Көмүс дуй күһүҥҥү симэҕэ
Көрүлүүр тулабын киэргэтэ
Кэлэр кэм сырдыгар угуйан
Кэрэхсээ диэбиттии мичээрэр
Ол эрэн билэбин Кыыс Күһүн
Олохпут эргиирин түстүүргүн
Дьыл кэмэ солбуллар аартыгын
Дьоһуннук арыаллаан иһэргин
