Текст песни
Дыр дар даах даах ырыалаах түнэ саары чаккылаах
Хайҕал диэҥҥэ кыһаммат сэҥээриигэ санаммат
Хара тураах обургу олороохтуур судургу
Киэргэнэргэ наадыйбат көргө нарга халыйбат
Өрө дайа сапсынар аһын үөлүн булунар
Атын ыырга саараабат көстө биллэ сатаабат
Арай сааһын эргиллиэ тиэргэннэргэ тиргиллиэ
Оччоҕуна үөрэллэр тураах кэлбит дэһэллэр
Арыт маҥан турааҕы сыыһа халты ыйааҕы
Үгэргээннэр кэпсииллэр номох гынан сиилииллэр
Онон кини харата саһа сылдьар ырата
Ордук курдук буоллаҕа ыйаах оннук туоллаҕа
Маҥан тураах буолбакка үгэргээһин ылбакка
Баарбыт курдук сылдьыахха олохпутун салгыахха
Тураах кэлбит ыраахтан хоту сирин дьиҥ ахтан
Маҥхайбатах дьүһүнүн үөрэ көрдүм көрүҥүн
Быйыл эмиэ сайылыа төрүө ууһуо кыах ылыа
Күһүн үөрдээн айанныа ырыых ыраах аттаныа
Ырытабын ырааҕы аһыммаппын турааҕы
Айыы анал биэрдэҕэ маннык буоллун диэтэҕэ
Айбыттартан ылбыккын дьылҕа гынан талбыккын
Уларыта сатаама маҥан өҥҥө саантаама
Маҥан тураах буолбакка үгэргээһин ылбакка
Баарбыт курдук сылдьыахха олохпутун салгыахха
