Текст песни
Саҥардыы тыллыбыт боруҥуй хахыйах
Синньигэс бэйэлээх кыысчааны санатан
Силлиэ тыал күүһүгэр охтуохча айылаах
Силиһиҥ туомунан тураҕын тутуһан
Кэм ааһан улаатан эн уһаан иһэҕин
Кыыс кэрэ таһаатын санатан үүнэҕин
Киистэлээх кэрэнэн тэлимнии сапсынан
Килбиктик сиккиэргэ бигэннин уйдаран
Сыллата туос ойууҥ симэҕэ тиһиллэн
Субалаах хатыҥ мас аатыран иһэҕин
Солколуур соһонон сотоҕор килбэйэн
Сыа тунал чүмэчи тунааран кэрэҕин
Сотору соҕус эн далбар куо буолаҥҥын
Сойутар күлүккэр лаглаҕар лабааҕын
Санньыччы соҕустук силигир ыйааҥҥын
Сэбирдэх сипсиэрин нарыннык ыллаттыҥ
Тохтообот сэлиинэн кэм кэрдии эрдинэр
Торҕолоох күөхтэриҥ лоһуора лөглөйөр
Туос ньууруҥ чиргэтэ кэтирии тэнийэр
Талыыкан хатыҥым халлааҥҥа өндөйөр
Саас баран ыраатан субата чэрдийэр
Суугунуур баараҕай хотун мас чэлгийэр
Симэһин утахтаах чээрэтин үүннэрэр
Силиһэ муостуйан удьурҕай бэрдийэр
Хатыҥ мас барахсан үйэҕин ситэҥҥин
Хаарыаннаах эдэргин эн саныы түөһэҕин
Хас үйэ хаарыгар баттатан түһээҥҥин
Хампа күөх сайыҥҥын санньыйа күүтэҕин
