Текст песни
Көмүскэл боотура буолартан сүөм үрдээ
Ыччаты дойдутун таптыырга эн сирдээ
Өбүгэ кэриэһэ, айыыһыт алгыһа
Буолуоҕа ыар кэмҥэ абырал аргыһа
Бүрүүкүү сабардыыр тумантан саллыма
Өһөхтөөх үөҕүүттэн дьулайа сыыллыма
Күрүлгэн обоччо ыарыттан кэхтимэ
Ньүдьү да балайга иннигин биэримэ
Ыарахан соруктан тэйээри куотума
Соһуччу кылбайар кыайыыны тумнума
Кырдьыкка кырбанар түгэнтэн саһыма
Куттанан албынныыр албаһы талыма
Иэдээни элэктиир тулууру эн сатаа
Бэйэҕэр күөдьүйбүт кутталы хам баттаа
Инники барартан бургуйар буолума
Үҥсэргии үҥсүүнү үллэтэ уотума
Өстөөхтүүн көрсүүгэ эн өһөн биэримэ
Ис кутуҥ туругун нэлэтэ тиэримэ
Хабырдык хапсыһан хадааргын киллэрээр
Кэннинэн кэхтибэт санааҕын биллэрээр
Дьылҕаҕын харыстыыр итэҕэл ылынаар
Үс куккун арчылыыр аналы талынаар
Оччоҕо хара дьай чугаһыан саллыаҕа
Айыыһыт алгыстаах өрөгөй ыллыаҕа
Өстөөххүн өһөрөн Дойдугар эргиллиэҥ
Олоххун оҥостон тиритэ тиргиллиэҥ
Айыыһыт анаабыт ыйааҕын толоруоҥ
Бааһырбыт ил куккун арчынан оһоруоҥ
