Текст песни
- Си къуэш, си пщафIэ, умыбэлэрыгъ:
Шу гуп къэсащи, фIы ягу къытхуимылъ! -
Шу гуп къэсам саныпожьэ сэ,
ФIэхъус - сэламкIэ къытызошэ.
ХьэщIэныш пшэрыр хузоуыкIыри уой,
Шу гуп къэсари согъэтхъэжыр уо.
ПцIэгъуэплъым тесыр мэшэсыжри:
- Уи къуэш уи пщафIэр къызэт! - жеIэ.
- Си къуэш си пщафIэр уэстыфынкъым,
Гуартэм хэт мэлищэр уэ узотыр!
- Гуартэм хэт мэлищэр уи адэм иреIэж,
Уи къуэш уи пщафIэр къызэт! - жеIэ.
ПцIэгъуэплъым тесым къызехулIэ,
Шы сокум хэлъу Iузогъэхыр.
ПщIэгъуалэм тесыр мэшэсыжыри:
- Уи къуэш уи пщафIэр къызэт! - жи.
- Си къуэш си пщафIэр уэстыфынкъым,
Гуартэм хэт хэкIуапщIэр уэ узотыр.
- Гуартэм хэт хэкIуапщIэр уи адэм иреIэж,
Уи къуэш уи пщафIэр къызэт! -жеIэ.
ПщIэгъуалэм тесым къызжьэхехуэр,
Уанэгум илъу Iузогъэхыр.
Къыдырым тесыр мэшэсыжри:
- Уи къуэш уи пщафIэр къызэт! - жеIэ.
- Си къуэш си пщафIэр уэстыфынкъым,
УзыфIэфI дыдэмкIэ къызбгъэдыхьэ!
Къыдырым тесыр къызжьыхолъэри
Шы пщампIэм дэлъу сырехьэжьэ.
- Си къуэш си пщафIэ, умыбэлэрыгъ,
Къыдырым тесым сыпIэщIехыр сэ!
Си къуэш си пщафIэр къыпоуври
Мэлыжьым хуэдэу къыфIегъэжыр.
Гуэбэнэдж лъабжьэм сыкъыщIоплъыр,
Лъы пцIам сыхэлъыу соусыжыр.
