Эльмира Калимуллина Кышкы Ялкын

Язылмаган җырлар...
Кабынмаган җаннар...
Бураннарда дөрләп
Бүген кышлар яна.
Язлар көтә язмыш
Тәрәз төпләрендә,
Янгыннарга ябышып
Гөлләр күтәрелә.

Ахыргача яну
Беләм, мөмкин түгел.
Кышкы гөлләр булып
Язлар көтәм бүген,
Салкын тәрәзләрдән
Ала алмый күзем.
Янгыннарын кышның
Мин кабыздым үзем.

Салкын бураннарга,
Салкын диварларга
Җан ялкының ябып
Бүген кышлар яна.
Ялкын булып дөрли
Карлы бураннары.
Сагышларның җанда
Ут кабызган чагы.

Ахыргача яну
Беләм, мөмкин түгел.
Кышкы гөлләр булып
Язлар көтәм бүген,
Салкын тәрәзләрдән
Ала алмый күзем.
Янгыннарын кышның
Мин кабыздым үзем.