Василий Новоприезжий Билэҕин дуо олох олорор кэрэтин?

Бу орто дойдуга ананан кэлэҥҥин
Билэгин дуо олох олорор кэрэтин
Киһи диэн ааккын сиэрдээхтик сүгэҥҥин
Хардыылыан дуо чиҥник атаххар тураҥҥын

Айылҕа уһуктан, сир үрдэ симэнэн
Кэхтибэт тойугун чугдаарда туойарын
Чурулуу-чарылыы сүргэни дэгэтэн
Оҕолуу истиҥник чаҕаара үөрэрин

Билэҕин дуо олох олорор кэрэтин
Бу орто дойдуга олох олорор кэрэтин

Саҕахатан сарыала сандаара мичийэн
Көмүс күн күндээрэн күөрэйэн тахсарын
Хараҥа халлааны үргүтэ үтэйэн
Сырдыгы сылааһы тулаҕар ыһарын

Илгэлээх ардахтан тыыллаҥныы нүөлсүйэн
Күөх сирэм күөгэйэ сэгэйэ тыларын
Олохпут оргуйар күүһүттэн саҕылла
Сүрэҕиҥ эппэйэ дьолунан туоларын

Билэҕин дуо олох олорор кэрэтин
Бу орто дойдуга олох олорор кэрэтин