Chingis Уттундурбас час

Чадыр өгнүң чаглак болур дээвиири дег,
Эргим черже эглип баткан будуктарлыг.
Каш дөс үнген кара талдар анай-хаагы
Сарыг өңнүг саглаңайнып чайгандылар.
Каш дөс үнген кара талдар анай-хаагы
Сарыг өңнүг саглаңайнып чайгандылар.

Часкы бойдус чараш-каазы мени четкеш,
Чалыы үем сагындырып эргикседи.
Ынакшылым ыры безин ындынналып
Сагыжымны чалгынналдыр чүглевитти.
Ынакшылым ыры безин ындынналып
Сагыжымны чалгынналдыр чүглевитти.

Хөй-ле часты көрүп, чурттап өзүп келдим,
Чамдыктары сагышта чок, уттундурган.
Чаңгыс-ла час - чалыы назын мээң-биле,
Өскерлиш чок өңнүүм ышкаш, кады чору.
Чаңгыс-ла час - чалыы назын мээң-биле,
Өскерлиш чок өңнүүм ышкаш, кады чору.