Текст песни
Джазда, джайда сакълайма тауларымда
Кёксюл ашхамларымда, тангларымда
Кел, шохум, кюндюз кёллендирелле джол ызла
Кече уа сени ашырлыкъдыла джулдузла
Кел, кел, кел, кел
Тауланы кёр!
Джерими джазы, джайы да - шоркъа тауушлу
Джолунга тюшер кенг ауанасы тау къушну
Кырдыкны чыгъын кюн джылтыратхан кёзюуде
Джугъутурланы кёрюрсе тауну кезинде
Чакъырама, сакълайма тауларымда
Кюзню ашхамларында, тангларында
Элпек тирликни джыйгъан да джигер эллиле
Салкъын тёбеннгиде эшитилир Эрирей
Кел, кел, кел, кел
Сакълайды эл!
Джерими кюзю бишген шапталла тюрсюнлю
Къууанч джарытыр сени тюнюнгю, тюшюнгю
Бирге къарарбыз элимде баргъан тойлагъа
Алгъыш этербиз чагъырдан мюйюз толгъанда
Чакъырама, сакълайма тауларымда
Къышны ашхамларында, тангларында
Бетинги сыларла Минги Тауну джеллери
Билесе джюрек джылыуну сууукъ дженгмезин
Кел, кел, кел, кел
Урса да джел!
Джерими къышы ушайды сейир джомакъгъа
Акъ кёгюрчюнле - къаялада къар джуммакъла
Санарма санга мен джигитлени атларын
Айтырма санга таурухларын да нартланы
Кел, кел, кел, кел
Тауланы кёр!
Джерими джазы, джайы да - шоркъа тауушлу
Джолунга тюшер кенг ауанасы тау къушну
Кырдыкны чыгъын кюн джылтыратхан кёзюуде
Джугъутурланы кёрюрсе тауну кезинде
