Дьякон Федор, Православные Молитвы Молитва Александру Невскому

Скорый помощниче всех усердно к тебе прибегающих
И теплый наш пред Господом предстателю
Святый благоверный великий княже Александре!
Призри милостиво на мя недостойнаго
Из глубины сердца к тебе взывающа

Ты в житии твоем ревнитель и защитник веры был еси
И нас в ней твоими к Богу молитвами утверди
Ты великое возложенное на тя служение тщательно проходил еси
И нас твоею помощию пребывати, в неже призван есть, настави

Ты, победив полки супостата, от пределов Российских того отгнал еси
И на нас ополчающихся врагов низложи
Ты, оставив тленный венец, избрал еси безмолвное житие
И ныне венцем нетленным на небесех царствуеши

Исходатайствуй нам житие тихое и безмятежное
И к вечному Царствию шествие неуклонное устрой нам
Молися о всех православных христианех
Да сохранит их Господь Бог Своею благодатию в мире и здравии

Да присно славим и благословим Бога
В Троице Святей славимаго, Отца и Сына и Святаго Духа
Ныне и присно и во веки веков
Аминь