Текст песни
Эһиэхэ бу сиргэ үтүөнү түөһээри
Эрдэттэн бэлэмнээн хатаппын хостоотум
Этигэн ырабын көҥүлгэ үөтээри
Этиибин саҕалыыр кутаабын күөдьүттүм
Олохпор ойдубут олукпун хомуйан
Хаһан да сөҕүөрбэт кулуһун отуннум
Ис куппар кистэммит илбиһи хостооммун
Иччилээх тылларбар хотоҕой холбоотум
Аал уоппар ааттаһан айаара туойаммын
Үрдүкү айыылар ааттарын ааттааммын
Түөрт саха төрүөҕэр төлкөтүн туомугар
Түөлбэ хаан дүҥүрбүн дүрбүйэ оҕустум
Киҥкиниир киэҥ куйаар киэлитин тэлэммин
Күн ууһун дьонугар көмүскэл көрдөөтүм
Аарыктаах айаным аартыгын ааһаммын
Айыы хаан аймаҕар алгыспын анаатым
Сарсыҥҥы сарыала кэриигэ кирийбит
Самныбыт саҥнаахпар саргыны салайдым
Сап саҕа утахтан сырдыкка таласпыт
Саталаах өһүөнү сахабар иҥэрдим
Көмүскэс санаалаах Күн өркөн ууһугар
Кылбайар кылааннаах кылыһы туттардым
Урааҥхай удьуорун утумун туһугар
Кураахтаах ох саатын санныгар ыйаатым
