Иван Смирнов Марий кас

Калыкна мемнан – ик еш
Чумыргалын иквереш
Таче кушталта-мура
Ура чонжым кандара
Эх вет, ох вет, томаша
Тургым, сомыл да паша
А кунам пыта паша
Каналташ пырля келша

(Шеҥгек-ончыко ит ончо)
(Шокталтал виян, гармоньчо)
(Тыштак теве тӱмырзӧ)
(Чот йоҥгалтше тӱмыржӧ)
Сем почеш тулар-тулаче
Лийыч пуйто ӱдыр-каче
Кертыт, кертыт – ух, ия
Три-ли-ли, рия-рия

Кид лывыргем рӱзалта
Йол лывыргем тавалта
Кап-кылыштем вӱр модеш
Самырык лияш йодеш
Чу-ян, мом тый ыштылат
Мом йолемжым тошкалат
Шоҥгешет, шоналтыде
Шижтарет ала тыге

Кас каваже волгалта
Шӱдыр-чинчым шавалта
А мемнажым ик тӱшкаш
Чумырале «Марий кас»
Муралтал да кушталтал
Мыскарат ден воштылтал
Улына ме ты кастен
Рвезе пагытна пелен