Текст песни
Важöн олiсны-вылiсны дас кык ая-пиа,
Ная мöдöдчисны вöравны-уравны,
Медыджыд писö ыстiс дай плöтник ордö
— Плöтникöй пö да, плöтникав, бурыльöй,
Кар тэ, кар тэ пö миян дас кык морта бур пыж,
Сирав тэ сiйöс пö дай сьöд кырнышöс моз!
Сiя карас и зэв регыд дай зэв бура!
Шöркос писö ыстас дай кузнеч ордö
— Кузнечöй пö дай, кузнечав, бурыльöй,
Кар тэ кар пö миян дас кык чер да, дас кык пурт да, даc кык штык!
Меддзöля писö ыстас дай кöтельник ордö
— Кöтельникöй пö дай, кöтельникав, бурыльöй,
Кар тэ, кар пö миян дас кык морта бур пöрт!
Ная лэччöдасны да и, пыжö пуксясны да и, кывтасны
Кывтасны ная Емва кузьта,
Катасны ная Весьва кузьта,
Воасны ная дай самöй пристаньö,
Катлысясны ная чомйö да, пыжсö кыскасны да, чом карта саяс пöрöдасны
Мöд лун ная ветласны вöравны-уравны,
Налы зэв уна шедö прöмыс да, зэв бур ку да, зэв дона ку
Мöд лун чеччасны да ная ыстасны квайт бур воксö öтарö,
Квайт ая-пиыс мунасны да мöдарö
Ветласны, ветласны да Емва ыджыд ошкыс и вормöччас
— Юсь-дзодзöгъясöй дай бур войтыръясöй,
Ме, — шуö, — тiянöс да ставныдöс и нилышта!
— Ен кö, — шуö, — сийöма, нилыштан,
А Ен кö, — шуö, — абу сийöма, важтö бöр восöдан!
